喺農曆新年期間，立法會議員同區議員都會紛紛落區，向街坊拜年，而往年會以一身「財神」打扮落區嘅立法會工程界議員盧偉國，尋日年初三亦再度現身，今年佢就孖住立法會議員梁美芬、化身成「祿星」嘅九龍城區議員張仁康，齊齊落紅磡區（圖），除咗向市民拜年之餘，仲大派朱古力金幣利是。「財神」盧偉國仲搞搞新意思，用色士風吹奏咗幾首賀年歌，包括《財神到》同《歡樂年年》，深受街坊歡迎，更加成為「集郵」嘅對象添！
（受訪者提供圖片）
