政壇：入市博翻身 橄欖有貼士
話說羊年股市大插水，唔少小股民成手蟹貨，唔知猴年可唔可以返家鄉？立法會議員「橄欖」陳鑑林一向投資有道，問佢猴年投資貼士，佢分析現時股市跌到一萬九千點上落，比起高位二萬八千點，跌咗差不多成萬點，估計再跌一萬點嘅機會頗低，建議大家有閒錢不妨入市，現時每手股票成本都相對較平，風險亦較低。
陳鑑林（右）同長子陳俊傑煎咗年糕同蘿蔔糕出嚟奉客，一齊應吓節。
橄欖建議，可以考慮買建設銀行，至於舊年金融服務界議員「肥佬闆」張華峰曾建議大家買港交所，橄欖就話當時每股成三百元，佢無入貨喇，但現時跌到一百六十幾元，有閒錢都可以留意。樓市方面，佢就建議大家唔好太心急入市，認為要睇形勢靜觀其變，起碼等到今年下半年先至好諗。
不過，橄欖舊年底就買入牛池灣峻弦一個一千七百呎單位，覺得呎價相當抵買，但管理費就成三個幾一呎，即足足六千元管理費。佢就話管理費貴就貴啲，但保安等服務都好好，加上孫兒要去九龍塘返學，交通好方便，物有所值嘅！
講開又講，今年十月新一屆立法會展開，邊個會適合做主席？橄欖就讚梁君彥唔錯。新民黨主席葉劉淑儀又好唔好呢？佢指葉劉做人事編制小組委員會主席主持會議「鬆到不得了」，笑笑口話懷疑葉劉有冇睇清主席嘅權力喎。
