政壇：黃靜文搵份逍遙工
政制及內地事務局前副局長Adeline黃靜文，喺舊年約滿、唔再續任中華廠商聯合會行政總裁後，一直未有新動向。但我哋收到風，Adeline將喺本月底復出，擔任香港貿易發展局助理總裁。適逢本月二十九日貿發局將舉行傳媒新春聚會，屆時貿發局各部門主管同高層都會傾巢而出，唔知到時Adeline會唔會現身見大家呢？
新工搵上門 拒絕高壓
Adeline喺舊年五月離開廠商會後，不時傳出有工「搵上門」，例如遴選平等機會委員會主席時，曾有獵頭公司向佢招手，又聽聞港鐵設立公司事務總監新職位時，亦曾考慮搵Adeline，但最終由時任香港工業總會總裁嘅蘇家碧出任。
據悉Adeline唔想背負太大工作壓力，所以對於新工作比較多揀擇。Adeline離開廠商會之後，曾經講過唔想做太繁重嘅工作，尤其係經常要飛來飛去嘅工作，因為佢想過逍遙一啲嘅生活，可以得閒放假，打最愛嘅高爾夫球。
咁邊個向Adeline招手呢？據聞今次係貿發局總裁Margaret方舜文親自搵Adeline加入。Margaret同Adeline都係政務主任（AO）出身，佢哋分別喺○九年及一二年離開政府呢個「熱廚房」，可能大家背景差唔多，特別投契，所以先至吸引Adeline應承復出。
究竟貿發局呢份工係咪真係好逍遙呢？睇嚟要等Adeline返工後至知喇！貿發局主要負責推廣香港嘅對外貿易，相信以Adeline喺政府同廠商會嘅多年工作經驗，應付新工作綽綽有餘。本報曾向Adeline求證，惟至截稿前仍未回覆。
