城中鏡：樹根 阿Ann 最怕講多錯多
香港術數家協會術數師楊子東繼續為本報讀者批算政界名人嘅猴年運勢，繼多名行政會議成員同泛民立法會議員後，今次輪到三名建制派「悍將」鍾樹根、Ann蔣麗芸同梁美芬嘅流年運程。三人都喺農曆八月份當旺，其時正正係新曆九月立法會選舉嘅大日子，全部連任嘅機會非常大，惟樹根同阿Ann就要避免「講多錯多」。
鍾樹根指之前亦有朋友勸慰佢少說話、多做事，同楊師傅嘅「講多錯多」說法不謀而合。
蔣麗芸農曆八月全年最旺，勢必成功連任，但九月又會凶多吉少、講多錯多。（資料圖片）
梁美芬農曆七月有小人是非。（資料圖片）
樹根生於一九五七年，屬雞，八字用神用金水，猴年上火下金，大運行丁酉運，運程較旺，但八字忌木火，因樹根係水命，行木運，變咗「講多錯多」，如果佢可以少說話，運勢會更好，尤其農曆五月忌神出現，繼續說話就會被好多人圍攻，應該低調一啲，否則到六月就好多小人是非。總結來說，佢整個上半年運勢平平，宜少說話，至七、八月運勢較旺，旺足兩個月，到九月應收手，而十一月就全年最旺。
樹根認為預測準確，因為今年開始「講少啲嘢，只係寫嘢」，審議版權修訂條例時寫咗講稿都唔用，大家亦覺得佢應該暫時避一避。佢又透露，有一位懂命理之說嘅朋友曾贈佢幾句，內容同今次批算相若，所以佢希望來年運用第二個策略行事。至於會唔會擔心少說話令金句數目大減，佢笑言會講得精簡些，例如「萬事如意」、「新年進步」。對於農曆五、六月時可能多小人，樹根認為喺籌備選舉嘅階段，每個人都會面對呢個挑戰，又希望每個人新年都會行好運。
梁要識「見好就收」
阿Ann則生於一九五五年，屬羊，丁火命，忌木忌火，八字用神用金水，來年運勢不錯。農曆正月運勢較差，係「無禮之刑」，講多錯多，二月亦不利，故此正、二月要收斂，諗過先講，應講則講會較好。全年最差係五月，最好請假出外，否則手尾長，七月略有起色，八月全年最旺，「天下無敵」，但九月又凶多吉少，講多錯多，總之反反覆覆，大上大落。
梁美芬生於一九六一年，屬牛，用神是「火土」，「金」排第三。農曆正、二月易被人拖累，誇大其說話「入佢數」，三月易有利益關係爭吵，與人對立，四月表面風光，但有壓力，五月吐氣揚眉，「講乜都有人信，講乜都啱」，六月過剛則折，不懂見好就收，便像鐵達尼一樣，「撞埋去就玩完」。七月有小人是非，但梁夠強大，「篤佢背脊都篤唔入」，八月大旺，「講咩都掂，做咩都得」，如果能有計劃地做，冬天會「好硬淨」。
