城中鏡：卿姐宜揾女性接棒
新正頭最重要係開年開得好，本報繼續邀請香港術數家協會術數師楊子東，為政界名人批算猴年運程。今日輪到為三名泛民立法會議員──民主黨主席「卿姐」劉慧卿、社民連主席「長毛」梁國雄同新民主同盟范國威指點迷津。猴年政界大事，當然係新曆九月（農曆八月）嘅立法會選舉，其中卿姐同長毛都有意向黨內年輕人交棒。楊師傅算出，卿姐今年運勢較差，退落嚟係明智之舉，且應能成功交棒，但傳女好過傳男，至於長毛交棒就有好大機會「甩轆」。
梁國雄
范國威
劉慧卿
適時退下 明智之舉
卿姐生於一九五二年初，屬兔，今年忌神出現，大運同流年運皆差。若以出生年、月、日三柱計算，佢全年只有一、兩個月當旺，農曆三月大勢已去，七月更是大局不妙，八月仍無起色，唔角逐連任係聰明嘅選擇。卿姐想交棒予第二梯隊，又係咪成功？楊師傅起咗支卦，結果係「水澤節，坎為水，兌為澤，五爻變，變地澤臨」，看似能成功交棒，但中間有好多阻滯，交畀女人成功機會較大，交畀男人會有少許危機。
長毛生於一九五六年，丙申年，猴年六十歲，係佢嘅本命年，農曆五月同九月「亂嚟分分鐘食皇家飯」，六月做事吃力不討好，「掟幾多次蕉都冇用」，而十一月則有貴人相助，坐長監機會較微，即使判囚亦只係十日、八日。
長毛農曆七月做事獲讚賞，到八月依然好運，若其競逐連任，成功機會好大。至於能否成功交棒，師傅就起咗支卦，結果係「雷澤歸妹」，即係先甜後苦，如果交棒，出選時「好似好勁」，但最後仍會選唔到，而且呢支卦係雷澤歸妹二爻變，變成震為雷，六沖卦，即係一個高塔被雷劈斷，一定失敗，若交棒未必成功。長毛回應時多次強調唔明白術數師所指為何，會繼續做自己應該做嘅事。對於有指佢五月同九月或會惹上牢獄之災，佢笑言：「人哋告我，點可以阻止。」佢又話從來無交棒嘅概念，因為每個人都憑實力競選同爭取選票。
新同盟區議會選舉大勝，但該黨唯一一名現任議員范國威，連任可能出現暗湧。由於唔知范國威嘅出生時辰，楊師傅批算佢為「從格」，運勢上半年極好，下半年極差，而農曆八月選舉，其運勢八月唔吉利，未能當選嘅機會大增。
