城中鏡：肥亨憶放煙花「好爽」
新一年是猴年，香港工商界名人齊為本報讀者送上新年祝福，包括港鐵主席「肥亨」馬時亨夫婦、香港中華廠商聯合會會長李秀恒、香港工業總會主席鄭文聰同香港總商會總裁袁莎妮祝大家身體健康、心想事成！並希望港人猴年和氣生財。
馬時亨同太太祝願香港猴年和氣生財。
袁莎妮難忘大伯父疼愛。
李秀恒難忘小時候賣桔賺錢嘅經歷。
鄭文聰童年時好鍾意玩爆竹。
講起過年，肥亨回憶小時候過節嘅氣氛比較濃厚，屋企有好多傳統習俗要做。例如過年前會同家人出去買新衫，甚至連內衣褲都係全新。媽媽係客家人，所以屋企嘅年糕同坊間買嘅唔同，分量有幾十斤重！而佢特別懷念同表弟曾志偉一齊燒炮仗同放煙花，形容當時嘅感覺「好爽」。
李秀恒則特別恭祝大家新春大「吉」，皆因佢年少時每逢農曆新年都會「運桔」，即同家人一齊賣桔，然後幫人送到府上。佢笑言「運桔」得到嘅貼士比賣桔賺嘅錢仲多！
袁莎妮收「金幣」
傾開童年過年回憶，鄭文聰最難忘放爆竹同煙花，經常玩到手指爆裂。佢話依家香港唔可以放爆竹，但年初二市民可以喺維港欣賞煙花，既安全又壯觀。袁莎妮則難忘小時候向大伯父拜年時，總會獲贈超大嘅金幣朱古力，但係佢嘅細佬則只獲五毫子大嘅朱古力，此後細佬經常提起呢段往事。
