城中鏡：葉劉連任勢危
又到新一年，本報一如以往精選十多位政界名人，邀請香港術數家協會術數師楊子東批算猴年運程，希望為政局把把脈，首篇主角為三名行政會議成員葉劉淑儀、李國章同林健鋒。身兼立法會議員及新民黨主席嘅葉劉淑儀，舊年農曆年初二被麒麟撞飛之後，運勢一直平平。楊子東批算葉劉猴年運程，指佢今年運勢依舊平平，八月競逐連任立法會都會徒勞無功。至於同為行會成員嘅林健鋒同李國章，猴年就有運行。
葉劉淑儀
林健鋒
李國章
自信天道酬勤
楊師傅批算，葉劉舊年開始行轉角運，會行十年衰運，至於猴年嘅流年運同大運都行忌神運，全年運勢平平，農曆四月有機可乘，若能見好就收，或會有少許得着。五月則有出頭天，木火一齊嚟，運勢當旺，而佢忌金，農曆七月立秋後「千祈唔好亂嚟，否則呢兩個月就唔掂」，佢七月開始唔吉利，八月選立法會將徒勞無功，立冬後先轉運。楊師傅提醒，葉劉若五月有公職，係可能做到嘅，但唔會做得好，因為葉劉運勢不佳「受唔起」，唔適宜當官。
葉劉回應時話佢從來唔信邪，只相信天道酬勤，所以毋須擔心。至於農曆五月時若接受公職，可能會做到，佢強調自己唔會貪圖眼前小利，一心服務市民，所以「唔擔心咩罡風、妖氣、衰運」。對於立法會選舉可能徒勞無功，葉劉認為任何民主選舉都有不可預測性，故不會因預言而有陰影。
羊年是非多多、兩度遭港大學生圍堵禁錮的李國章，八字用土用金、忌木忌火，猴年金旺，應該冇大麻煩，全年運程有八十分以上。農曆正、二月運勢較差，至五月全年最差，「綁手綁腳，做咩都唔掂」，多小人，六月火上加油，直到七月先可解沖，即可解決問題。八月做事有成績，九月又舊事重提，多小人是非，十一月好運，多做事會有成績。
喺羊年成為政改表決「甩轆」鬧劇主角嘅林健鋒，生於一九五二年屬龍，水命，八字用神為金水，忌火土，猴年運程合格以上，但上半年運程麻麻，頭四個月都積弱，農曆五月更係全年最差。至於佢後半年運程較好，七月有轉機，八月好運，但九月衰運重臨，宜低調，十月開始整個冬天都轉旺，可以追補之前做唔到嘅事，十一月係全年最旺，十二月仍有餘威。
