政壇：搞搞政：學搞選舉辯論 白鴿驚輸縮沙
立法會換屆選舉九月舉行，民主黨（白鴿黨）主席劉慧卿（卿姐）會退下火線，黨內將邁向年輕化，仲會進行參選立法會嘅黨員遴選，原本計劃倣效美國總統選舉咁公開辯論一較高下，但黨內有反對意見，除咗擔心要計算競選經費外，亦因該黨有意搵大專生參與辯論，白鴿黨中人擔心如果喺辯論台上輸畀大專生，既冇面又影響選情，結果，此議作罷。
卿姐去年十二月喺黨大會提出透過公開辯論，希望有意參與五個直選選區同超級區議會選舉嘅黨員，當眾展示才華，又可以提振知名度助出線。不過，該黨中委會幾次會議討論細節時，發現唔少問題，諮詢法律意見，更指辯論隨時要將初選以至正式提名嘅相關使費計入選舉開支，而且，公開辯論如何評價表現、係咪畀黨外人參與辯論、邀請哪些嘉賓同觀眾出席等，都有分歧。諗嚟諗去都搞唔掂，最終決定「唔搞好過搞」。
依家該黨三名立法會議員包括涂謹申、胡志偉同黃碧雲都決定參選，今次事件係咪顯示參加遴選嘅白鴿人顧忌多多，信心不足呢？卿姐話，公開辯論確有灰色地帶，至於佢會唔會因此唔開心？卿姐就相當豁達，話辯論只係一個建議啫。
