政壇：侯強心雄 萬人組黨
上水鄉事委員會主席侯志強（侯強）早前喺新界鄉議局會議上提議籌組「新界進步聯盟黨」（新進盟），上星期仲同鄉議局主席劉業強、副主席林偉強等人密會傾組黨，睇嚟組黨一事已經進入大直路！而侯強尋日仲喺羊年最後一日拍晒心口，話新政黨成立後，隨時有過萬人申請入黨添。如果係真嘅，佢哋即一躍而成本港政壇第二大勢力。究竟係侯強心雄、此夢太美？定係猴年新希望呢？
侯強表示，正式入黨申請表已草擬得七七八八，基本上都係宗教、籍貫等個人資料，仲有想參與乜嘢黨務嘅意願咁，再執吓細節就可以正式派發，實行招兵募員。不過喺派發正式申請表前，原來佢哋已經搵人簽入黨意向書，成績仲唔錯，收到幾千份。侯強仲預計，之前簽咗意向書嘅人會再申請正式入黨，所以相信新政黨嘅黨員人數會相當可觀，隨時會有過萬名黨員添！
臨門仲要「等埋發叔」
佢又話，呢班人係以非原居民佔多數，睇嚟新進盟真係唔止團結原居民。侯強仲好風騷咁解釋，因新進盟可以做到事事關心，同埋做實事，而且佢哋從來無分原居民或非原居民，所以先得到咁多人嘅支持。據了解，新進盟除咗好似早前報道所言，會喺鄉議局體制外設專責小組籌備組黨外，依家黨嘅政綱、架構、人事等安排都非常接近完工，進度可謂相當良好。
新界人組黨氣勢如虹，但我哋亦聽聞劉業強接掌鄉議局冇耐，組黨咁大件事除咗諮詢其他老臣子外，更重要係「等埋發叔」，皆因佢爸爸、鄉議局前主席劉皇發喺江湖打滾幾十年，組黨除咗係新界人嘅事，亦要考慮操盤人感受。據聞發叔雖然仲未正式出院，但基本上除咗行動唔係幾方便，思路仍然非常清晰。
