政壇：吳得掂 林大輝 互轟演鬧劇
上任以嚟教育政策搞到一團糟，但懶理批評熱衷外訪嘅教育局局長「吳得掂」吳克儉，尋日同傳媒聚會時聲稱，全港性系統評估（TSA）風波係佢加入政府後最唔開心嘅事。舊年十一月二十九日，立法會教育事務委員會主席林大輝召開TSA公聽會，但係吳得掂因要去日本過生日，堅拒改行程出席公聽會。吳得掂尋日就不點名批評大輝臨時要求開會嘅做法欠成熟，因為佢早幾個月前已請咗當日假。
吳得掂仲話大家都係成年人，做事應該成熟啲喎！吳得掂呢頭呻完，嗰頭大輝就隔空反擊，話思想成熟同負責任嘅官員，絕對唔會為慶祝自己生日而唔理政務，堅持到日本賞紅葉兼吃喝玩樂云云。
因為公聽會嘅事，吳得掂同大輝之前已多次隔空互數不是，而前日教育局接納檢討TSA委員會嘅建議，決定落實新安排，令社會上對TSA嘅爭拗稍為緩和，勢估唔到相隔唔夠二十四小時，吳得掂又舊事重提挑起火頭。講真，前日係立春，算係踏入猴年，新年流流，佢哋又再隔空嘈交，直情係雞同鴨講，點睇都唔似成熟嘅成年人，似小學雞多啲。
無厘頭自誇未請過病假
至於吳得掂任內嘅表現，最令人印象深刻就係頻頻外訪，幾乎每個月出埠一次。吳得掂可能想反擊，故尋日開場白無厘頭自誇三年嚟從未請過病假，但幼稚園學生都知，既然冇病梗係唔使請病假，唔通吳得掂係想暗示自己身體好？咁梗係喇！佢用公帑同返工時間頻頻出埠，又奉行放假大過天，就算TSA鬧得滿城風雨都堅持放假。做官做到好似佢咁樣「零壓力」，自然百毒不侵！講到尾，吳得掂自覺任內冇做錯乜嘢事，咁佢會畀自己幾多分？吳得掂推搪唔願評分。至於農曆新年臨近，識玩識歎嘅吳得掂有乜嘢過年攻略同大家分享？答案係：初三、四返鄉下恩平過年，其他日子留港消費。
