城中鏡：朱潔儀繪金猴 為港招財
尋日立春，正式踏入猴年。「港姐畫家」Donna朱潔儀花咗兩星期描繪嘅第十二幅生肖油畫《招財金猴》已順利完成，佢再次沿用往年嘅畫風，喺油畫中加上少量拼貼元素，提升喜慶氣氛，佢話：「畫中猴子攞住『招財進寶』揮春，膚色用上黃色，戴有香蕉形帽子，令佢睇落更加精靈，像頭靈猴。上年香港經濟稍有下滑，《招財金猴》寓意來年會風生水起、招財進寶。」
朱潔儀喺油畫中加上少量拼貼元素，提升喜慶氣氛。
咁呢幅係咪佢所畫嘅最後一幅生肖油畫？佢話：「是啊！所以我想將自己嘅生肖油畫連同水墨作品一起舉行展覽，望年底成事。畫完呢幅生肖油畫後有失落感，但亦感覺好輕鬆，將一系列作品放喺屋企欣賞時效果都好震撼，好似完成咗一趟長達十二年嘅使命咁樣，之後會再開始構思、創作其他作品，或者將生肖油畫印製成畫冊以作紀念，供大家欣賞。」
