城中鏡：逆境行善
面對經濟不景，慈善團體亦擔心來年籌款會面對嚴峻挑戰，即使如大型慈善團體東華三院亦有同樣憂慮。東華三院日前舉辦一百四十五周年慈善晚宴，主席何超蕸同副主席李鋈麟都擔心今年市道唔好，會少咗人捐錢。
何超蕸（左）同埋馬陳家歡話着宮廷裝需要特別小心。
李鋈麟（右）頸上黃色蜜蠟襯番皇帝裝。左為喜運佳鐘錶集團主席蔡加讚。
李三元（中）嘅服裝似乎唔夠兩個仔李曠怡（右）同李仲怡咁特別。
「時光倒流」 李鋈麟做皇帝
李鋈麟話以○八年金融海嘯嘅經驗，估計今年嘅大型籌款活動善款數字影響唔大，但恒常定額捐款或會下跌兩至三成，希望影響唔大。何超蕸認為繼續提供優質服務係最好嘅應對方法，至於今年東華同事有冇人工加呢？佢就話同事熱心服務，唔係為錢嘅，但都明白同事工作好辛苦，所以農曆年會封大利是喎。
當日晚宴以「時光倒流1870」為主題，多位名人都着上百多年前嘅中西服裝，李鋈麟着皇帝裝扮康熙，話深深明白女士平日着裙有幾辛苦，而何超蕸同埋另一位副主席Katherine馬陳家歡就雙雙夾好着宮廷裝，仲要襯埋顏色添！Katherine話連結婚都冇着過咁長嘅裙，今次都係第一次着，所以行路都要相當小心。
東華三院前主席李三元同兩個仔李曠怡及李仲怡亦難得同場現身。李仲怡話件衫係爸爸訂造嘅，但係爸爸肥咗唔啱着，佢就攞嚟着喇，但件衫相當緊身，佢當晚唔敢食得太多嘢，仲要企直啲至得。
至於着成套懷舊西服嘅李曠怡就話，由於市道太差，佢作為皮革供應商，下游工廠生意少，連帶佢嘅生意影響都好大，好擔心來年市道。
