立法會尋日續會審議《二○一四年版權（修訂）條例草案》，體育、演藝、文化及出版界議員馬逢國發言護航時，舉例指香港作曲家及作詞家協會（CASH）都係眾多個別創作人嘅代理機構，稱協會四千多名會員當中，「會員從好出名嘅，『已經離開咗我哋』嘅顧嘉煇、黃霑作曲作詞人，到寂寂無聞、仲等緊機會嘅年輕創作人」，也希望透過版權制度保障其利益及生計。

煇哥幽默邀赴音樂會

吓！仍然健在嘅「樂壇教父」煇哥無故被晚輩宣布「死訊」，認真大吉利是。嚇得人民力量嘅「慢必」陳志全隨即插話，稱知道黃霑「走咗」，但煇哥本月底仍會喺紅館舉行作品演唱會，要求馬逢國澄清。立會主席曾鈺成亦加把口，要求馬逢國解釋「『離開咗我哋』即係咩意思」。馬逢國自知誤報「死訊」，惟有死死氣澄清，指係「包括離開咗我哋嘅黃霑叔，同好出名嘅作曲（家）顧嘉煇先生」。

雖則話煇哥早年已榮休，馬逢國或可死撐煇哥只係「已經離開」樂壇，惟學慢必話齋，煇哥本月二十六及二十七日仲假紅館舉辦「顧嘉煇金紫荊慈善演唱會2016」，籌款協助年輕音樂人完成夢想，演唱會亦已公開售票，難道馬逢國想犧牲自己，為煇哥演唱會「曲線宣傳」？

年屆八十三歲嘅煇哥就幽默地回應：「我好忙，正在籌備音樂會，今次主力都係為香港做善事，可能馬先生亦都貴人善忘，本人現時還健在香港，我非常歡迎他來看音樂會，一齊共襄善舉啦！」為煇哥主辦音樂會嘅丘亞葵話馬逢國可能貴人善忘，未有了解煇哥，可能一時誤會，所以請佢睇煇哥嘅音樂會，讓佢更了解煇哥對香港樂壇嘅貢獻。馬逢國作為演藝界代表，今次認真老貓燒鬚！

第一手消息請下載on.cc東網iPhone/iPad/Android/Windows Phone Apps