薑愈老愈辣！立法會漁農界前議員、建仔嘅「肥根」黃容根尋日喺社交網站，運用專業漁農知識，幫黨友現任新界東議員陳克勤抱打不平，質疑食物及衞生局局長高永文日前喺立會回應紅潮令大量海魚死亡時，指淡水魚同鹹水魚不可混為一談，呢種講法不但搞錯，而且有卸責之嫌。不過，肥根唔講由自可，一出聲就凸顯啲後輩唔多掂，似乎道行未夠，以致未能即時反駁高永文。

稱城門河死魚致紅潮

話說前日立會討論由現任漁農界議員「高佬賢」何俊賢提出有關三門仔養殖區鹽田仔一帶嘅魚排，出現大量養魚死亡情況。點知到克勤發言時，忽然由三門仔跳到去城門河嘅死魚問題，即時被高永文質疑佢連海魚、河魚都分唔清，仲話兩者無關係，重申城門河嘅係河魚，應由環境局負責，仲話幫手轉達訊息！

曾經作為業界代表嘅肥根當然不滿啦，仲力撐克勤無搞錯，反指高永文卸責！佢解釋，實情係城門河先出現死魚問題，所以產生大量營養成分嘅有機物，搞到連接城門河嘅吐露港孳生大量米氏凱倫藻，最終引發紅潮，導致吐露港七個養魚區嘅養魚突然全部死亡！肥根認為今次死魚事件全因政府監管不力造成，更批評高永文混淆視聽，為求甩身而罔顧事實，將吐露港同城門河分開嚟講。

克勤無辜食死貓，見到有前輩幫佢平反，就即刻留言向肥根道謝，連高佬賢都加把口，強調城門河真係海魚，而工聯會鄧家彪亦爭住話，城門河前身係海，所以係海魚喎！其實高佬賢作為業界代表，無即場糾正高永文錯處，已經輸咗，唔知肥根會唔會感到「恨鐵不成鋼」呢？

第一手消息請下載on.cc東網iPhone/iPad/Android/Windows Phone Apps