城中鏡：佳釀不怕「冷」
香港作為外向型經濟體，易受環球經濟不景同本港股市波動影響，更陸續影響各行各業嘅生意，香港餐務管理協會主席楊位醒話，擔心農曆新年後就有餐飲業捱唔住，相反香港葡萄酒商會創會會長Henry何耀康係少有嘅工商界中人自我感覺良好，佢最少兩度反問「經濟唔好咩？」佢話事關飲酒已變成一種社交工具同品味嘅選擇，令業界生意保持唔錯嘅增長。
何耀康（中）形容飲酒已成為品味選擇。左為姬寶娜，右為法沙爾。
楊位醒慨嘆餐飲業經營艱難。
馬餘璇（右）同溫少文都有出席與業界歡聚。
香港葡萄酒商會早前舉行周年酒會，Henry形容葡萄酒業界有「三貴兩明」，其中「三貴」係指租金貴、工資貴，但酒價唔貴；而「兩明」係價格太透明、消費者太精明，尤其業界係以中小企為主，所以可以撐住嘅都係好厲害嘅業界精英。同場仲有香港貿易發展局展覽市場拓展總監溫少文、法國食品協會香港及澳門區總監Anita馬餘璇、阿根廷駐港總領事法沙爾同意大利商務專員姬寶娜等人。
馬餘璇力推「法芝」市場
講到農曆新年嘅市道，楊位醒話餐飲業訂位情況唔算差，但佢擔心過完年後，可能有人會捱唔住，事關近年市民除咗大時大節照常消費外，其他日子就慳住使，形容業界情況真係好慘。
正所謂「有危就有機」，Anita就展望未來尋找更多商機，佢話港人好鍾意法國葡萄酒同鵝肝，又話法國有幾百種芝士，而且食芝士猶如中國人食米飯一樣，再者愈嚟愈多人都鍾意食芝士配紅酒，因此認為值得喺香港進一步推廣。
