喺舊年底參選區議會落敗嘅趙哲妤，好快又返回自己嘅工作崗位，佢日前為迷你裙小姐活動擔任嘉賓，着高衩長裙嘅佢話：「本來我今日想着迷你裙配合番個主題，不過我上星期去台北同朋友玩得太開心，玩到整瘀咗隻腳都唔知，所以今日就要着長裙遮住，只可以露一條腿出嚟。」

為配合活動主題，趙哲妤展露天賦長腿。

點樣玩到整瘀？佢話自己都唔知，嗰晚啲朋友帶佢去當地嘅夜店見識，期間佢都無撞親或者整親，係返到酒店第二朝瞓醒先發現右腳瘀咗。

佢話：「嗰晚喺酒店仲有靈異事件發生，我喺酒店房打電話去前台諗住問職員拎個變換器，等緊時我隨手打開櫃桶，點知見到有三本聖經，嚇一嚇之後即刻閂番埋，跟住個電話就由原本嘅響緊變咗做長嘟，好驚，我惟有收線。好彩我係同個女仔朋友同房，嗰晚亦再無奇怪嘢發生，係第二朝發現隻腳瘀咗。」

第一手消息請下載on.cc東網iPhone/iPad/Android/Windows Phone Apps