政壇：鄺俊宇處男下海登銀幕
元朗區議員Roy鄺俊宇另一個廣為人知嘅身份，就係愛情小說作家。阿Roy尋日話有台灣電影公司對佢舊年出版嘅小說《在微時》有興趣，打算改編成電影，估唔到佢寫書寫到有機會上大銀幕添！
鄺俊宇百足咁多爪，做區議員外，仲寫書、拍戲，兼且有幾個廣告準備拍攝添！
阿Roy話自己嘅角色未定，但由於電影公司想搵台灣演員做男主角，所以佢未必會做男一喇，預計年底會完成拍攝。除電影外，佢近期仲為化妝品牌拍咗個「處男」廣告，佢話廣告商認為佢既係議員、又係作家，覺得佢身份都幾得意，相對健康咁話，下個月仲有四至五個廣告準備拍喎。不過佢報名參加黨友甄選今年立法會超級區議會，一旦出選，呢啲廣告都要暫時下架，唔係就要計入選舉開支，所以只能拍多幾個月。
另外，今日就係農曆年宵開幕之日，各個政黨都會趁機擺檔，作籌錢兼收宣傳之效。白鴿黨今年就會主打鬥獸棋，棋中角色玩盡舊年政壇熱門人物。作為黨員嘅阿Roy會幫手「畫」揮春，喺揮春畫Q版人像，可以吸到一班年輕人喎。
