政壇：高鐵拆散六人組團年飯

話說六人組同班助理、職員原定尋日喺灣仔一間酒店提早食團年飯，但六人組唔齊人，現身嘅只有四人，分別係商界廖長江、旅遊界姚思榮、建築界謝偉銓同體文界馬逢國，而金融界吳亮星同身兼財務委員會主席嘅保險界議員陳健波則未見蹤影。

據知吳亮星係港鐵獨立非執行董事，須出席尋日港鐵特別股東大會，見證大比數通過港鐵同政府就高鐵達成嘅協議；至於陳健波則準備舉行記者會，交代自己唔會主持涉及高鐵追加撥款嘅會議，因此「六人組」暫時六缺二嘞！

此外，仲記得陳健波舊年十月當選財委會主席後，「六人組」曾對外放風若陳被泛民包圍，其餘五人不排除築起人牆全力「護波」，但上周六表決港珠澳大橋追加撥款時唔見任何「護波」行動，莫非佢哋自己知自己事，擔心「護波」不成險上加險？