政壇：馬斐森失言 向利迷耍冧
話說香港大學校長馬斐森日前回信校友時，指上周二晚嘅圍堵校委會事件，令佢想起一九八九年嘅英國希斯堡球場人踩人慘劇。該宗慘劇奪去近百條人命，全部都係英國老牌球會利物浦嘅球迷，該番言論引起香港利物浦官方球迷會主席Steve Parry不滿，去信馬斐森要求對方道歉。馬斐森亦隨即覆電郵，向所有因其言論而感覺冒犯嘅人致歉，但係佢堅持學生當晚嘅衝擊行動好危險，隨時造成人命傷亡，呢個睇法佢唔會收番。
馬斐森
馬斐森覆電郵畀Steve Parry就引用希斯堡慘劇作比喻致歉。
（Steve Parry提供）
Steve Parry喺信中指出，希斯堡慘劇同當晚嘅圍堵事件根本係兩回事，又指有關該宗慘劇嘅審訊已進入最後階段，馬斐森喺呢個時候重提舊事，會令死者家屬承受不必要嘅壓力。本身嚟自利物浦嘅馬斐森就回信稱無意藉重提事件冒犯任何人，又強調自己都係球迷，對當年慘劇記憶猶新，因此佢先至特別着重安全問題。
