政壇：搞搞政：公文袋 新同盟 反口內訌爭超選

喺一二年立法會五席嘅超級議席，泛民合共取得三席，今年首要都係以保住三席為目標，其中公文袋黨魁梁家傑早前放風，建議泛民兵分三路爭三席，第一路係白鴿黨、第二路係民協、街工及工黨，最後一路係公文袋同新同盟，其中公文袋同新同盟依家都冇超級議席，此舉明顯係想透過出口術提早「插旗」。據知公文袋嘅如意算盤係估計新同盟未必派人參選，只要向其他泛民借到提名票，到時就有機會喺功能界別再多取一席，唯一隱憂係冇具知名度嘅區議員披甲上陣。

政治一日都嫌長，據知早前對選超級議席吹淡風嘅新同盟，產生微妙嘅變化，其唯一立會議員范國威近日向泛民議員摸底，查詢大家點睇參選超級議席，呢個正正同新同盟一向對外話，會考慮借票畀其他泛民嘅說法不同。

擁入場券 范國威變臉

新同盟嘅微妙變化建基於擁有十五名區議員，剛好取得參選超級議席嘅入場券，外界認為擁有一定知名度嘅范國威，代表新同盟出選超級議席嘅可能性最大，而且最有勝算，從而騰出佢原本嘅新界東直選議席，畀其他兄弟上位。

但新同盟若要出戰超級議席要解決兩個問題，一係點樣自圓其說，特別係范國威喺六年前反對超級議席退出白鴿黨，另起爐灶成立新同盟，到可能親自披甲上陣嘅突變；二係點樣避免重蹈當年民協嘅覆轍，具知名度嘅候選人轉戰並當選超級議席，惟老巢卻失手。究竟公文袋同新同盟爭崩頭想選超級議席，哪一方可笑到最後？一番政治惡鬥在所難免。