政壇：「有標時死多啲病人」
勞資雙方就標準工時立法一事各不相讓，向來語出驚人嘅立法會飲食界議員張宇人尋日又獻「新猷」，話公立醫院嘅醫生都想標準工時立法，「有標準工時咪可以死多啲病人，醫生個個唔使做囉」，又話醫生工作量大係醫務委員會唔肯輸入海外醫生所致。
立法會研究標準工時相關事宜小組委員會尋日下晝開會討論標時，議員矛頭原本直指政府拖延標時立法，醫學界議員「怪醫」梁家騮就以自身經驗講，「合約工時」嘅約束力有限，原因係當年自己同醫院管理局打官司，追討休息日、假期工作同超時補水，結果係「有贏有輸」，贏嘅係休息日同假期工作，因為相關法例清楚訂明；輸嘅係超時工作，「合約都有講明我嘅工時同超時補償，不過，原來上到庭，只要你超時工作一年都冇出聲，就會冇得追。」
勸商界留資本遷內地
怪醫嘅言論可能觸動商界神經，張宇人發言時即連珠炮發，形容自己係「蚊型老闆」，可能就快要太太、仔女幫手，唔係檔生意都可以「摺埋」，又話政府如果數夠票即管放馬過來，榨乾業界都唔緊要，事關已經勸身邊啲商界朋友留定資本，萬一有事發生就遷往內地經營。
張宇人炮轟政府後仍意猶未盡，又向醫學界「挑機」，話公立醫院嘅醫生都想標時立法，「有標準工時咪可以死多啲病人，醫生個個唔使做囉」。佢認為公立醫院醫生工作量大根本唔使靠標時立法，只不過係醫委會講明唔畀咁多外地醫生來，先至令到啲醫生咁辛苦。
話時話，張宇人嘅公院醫生標時論認真惹火，勢必喺醫學界引起好大回響，仲記得建制派議員蔣麗芸早前將拉布同精神病拉上關係，惹嚟醫學界炮轟，事後對此深感抱歉，前車可鑑，但張宇人係不以為然抑或唔記得咗，所以先咁講？唔知佢會唔會同一命運，要就惹火言論「補鑊」降溫呢？
