城中鏡：郭秀雲親子兵 撐保育穿山甲
名媛郭秀雲同仔仔龐景峰尋日現身深水埗市集，一齊擺檔賣慈善公仔環保袋，宣傳保育穿山甲。郭秀雲話自己事前並唔知情，由仔仔全權籌劃，佢坦言好開心仔仔主動出心出力，仲搵咗楊埕等圈內朋友支持。佢仲話稍後將到附近買潛水、爬山用品，兼去鴨寮街買偷拍器具，「我會親身去了解非法販賣（穿山甲）嘅地方，拍低咗啲片，我其實都會打格，唔係叫人去拉人，而係要去唔同嘅部門，話畀佢哋知國家有呢樣嘢發生緊，要阻止件事繼續落去。」
郭秀雲（左）同仔仔龐景峰齊出動宣傳保育穿山甲。
楊埕到場支持，仲同可愛嘅人扮穿山甲公仔合照。
郭秀雲又透露將在港過新年，之後將到佛羅里達開一個關於海洋保護嘅會議。佢笑言自己唔係環境保育出身，但一直心口掛個「勇」字，邊學邊做，「其實香港已經禁止咗拖網捕魚，魚嘅數量的確係反彈咗。不過都仲係做得唔夠，佢哋依家又起橋，咁啲白海豚都唔知去邊。」
到韓國發展嘅龐景峰就透露自己啱啱返港，稍後再到泰國宣傳後就會返港度歲，其後再返韓國。提到保育，佢話因有部分人相信食穿山甲鱗片所製嘅中藥有助產後補身、令皮膚變好等，所以穿山甲被大量偷獵同走私。佢話：「其實以科學角度，佢哋嘅鱗片其實同人嘅頭髮、指甲成分冇分別，所以食佢哋嘅鱗同食大腳甲冇分別。」加上啲人不斷破壞森林，亦係穿山甲瀕臨絕種嘅原因之一。
