城中鏡：閃婚冇尷尬
仲有一個禮拜就到農曆新年，一眾宅男盛女拜年時最怕被親友「審犯」咁查問拍拖或結婚狀況，為免尷尬同口啞啞，近日有網站就諗到招聘春節女友或男友，拜年前「夾晒口供」一齊見親戚，必要時仲可以拖手擁抱添！尋日喺沙田馬場見到香港首位華人女騎師Sherie江碧蕙，佢話當年未遇過呢啲尷尬情況，事關佢同男友拍拖一年就開門見山談婚論嫁，半年後就拉埋天窗，避過呢段尷尬時期。
江碧蕙當年拍拖一年半就結婚，避過尷尬時期。
郭詩慧話爸爸梗係想個女留喺身邊耐啲，當初絕對無催婚。
劉展灝夫婦話好多年輕人都希望有樓先結婚，做父母急唔嚟。
講到點解會出現招聘臨時男友女友呢個現象，Sherie話現時好多人都遲婚，或因覺得唔結婚都冇所謂，加上生活喺數碼時代，唔少人放假足不出戶喺家中上網又一日，不知不覺變成宅男或乾物女，到新年時親友問起又唔知點交代，於是就出現呢類需求嘞！
劉展灝話「急唔嚟」
至於莎莎國際主席郭少明女兒Melody郭詩慧就話，婚前冇試過被親戚或家人催婚，皆因當年家人早就送咗佢去外國讀書，而佢返嚟後，家人非常珍惜彼此相處嘅時間，爸爸郭少明更加唔想咁快嫁個女出去，想佢留喺身邊陪吓自己，所以佢喺呢方面可謂完全冇壓力。
同場仲見到生產力促進局主席劉展灝夫婦同保良局前主席鄭錦鐘夫婦。劉展灝話依家時代唔同咗，好多年輕人都話要有樓先結婚，作為父母嘅都急唔嚟，而佢同太太平日亦甚少干涉後輩嘅感情狀況，覺得有啲親戚好耐冇見面，問起都係關心吓佢哋或想打開話匣子。
