雖然So Call係建制派，但富貴黨立法會議員「田少」田北俊一直為自己打造「壞孩子」形象，鍾意抽水鬧政府，網上呃like無成本，似乎好過癮，點知接連抽水抽出禍！

田少日前將立法會審議港珠澳大橋追加撥款會議片段上載到社交網站，片段中問運輸及房屋局副局長「邱副」邱誠武，港珠澳大橋通車後係咪開車去到珠海，但邱副答唔出，田少就留言：「究竟係邊個求邊個？局長依家教我問問題？不如坦坦白白答好過啦！」田少寸爆邱副，但投票立場就被多名網民批評，點解佢投反對票？有人叫佢「不要每事都只為政府護航，做一位有良知的建制派」。田少就指自己已經無投票支持政府，但仍有網民不滿話：「你又唔投，抽乜嘢水啫你，慳啲啦！」又有人狠批：「做議員最唔負責任是不投票」。

其實翻查投票紀錄，田少兩位黨友張宇人同易志明都投贊成票，有網民就寸爆：「自由黨（富貴黨）最後咪又係投贊成票」，又有人叫佢問吓黨友，「點解（官員）乜都答唔到都投贊成票？」其實除咗田少無投票外，黨主席鍾國斌同黨魁方剛都無投票，但一度被網民留言誤指佢哋投贊成票。

田少抽水抽着火水都有前科，舊年十二月佢喺社交網站貼咗一張踩單車相，抽水話「好可惜」無機會考小三全港性系統評估（TSA），搞到用咗所有時間去玩，例如學踩單車，但隨即畀網民踢爆佢無就取消TSA議案投票，只係「得把口」抽水，最後佢要道歉收場。今次佢又重蹈覆轍，睇嚟要學網上潮圖講句「人類總要重複同樣的錯誤」呀！

第一手消息請下載on.cc東網iPhone/iPad/Android/Windows Phone Apps