政壇：民政局烏龍 區議員變性
有人同名同姓被認錯，中性嘅名字亦容易被人搞錯性別，最近就有區議員慘被民政事務局「變性」！話說新上任嘅沙田區議員黎梓恩，早前喺Facebook上載咗一封由民政事務局寄出嘅信件，封信嘅上款就寫咗「黎梓恩女士」，但黎梓恩明明係男士，民政事務局做乜咁失策呀？
黎梓恩（互聯網圖片）
（互聯網圖片）
黎梓恩話最近上任後先收到呢封信，以前細個讀書時都會被誤當係女仔。佢話以前未參選區議員時，畀人估錯性別都合理，但係經歷過選舉，政府會有佢參選資料，仲要係當選，認為民政事務局冇可能會發生呢啲低級錯誤，甚至仲覺得「離譜咗啲」。佢打算搵番有關部門搞清楚，以免有同類事件發生。
其實黎梓恩上載嘅相片入面，仲有一個名牌，係寫住「黎梓恩先生」，相信係佢喺區議會開會時所用嘅名牌，不過名牌上嘅性別冇錯，但民政事務局封信就出錯，莫非事前無同沙田民政事務處同區議會溝通？
