政壇：KK讓出議辦 死忍一殼淚

民協一連三日舉行感謝會回顧多年嚟嘅街坊服務，有女街坊上台講講吓嘢，突然停咗幾秒，當大家以為佢諗唔到下一句時，原來係激動到哽咽，而KK都不時抹眼，雖然喊唔出，似係死忍居多。

KK話今日就要將議辦交番畀房屋署，由陳穎欣接手，加上已決定今年九月立會選舉唔再選九龍西，故佢心情係雙重沉重，但佢唔會放棄麗閣同九龍西，皆因佢已將原辦事處電話轉駁去隔籬黨友選區、新任區議員Zoe鄒穎恒辦事處，又搵咗麗閣邨居民協會借地方會見市民，話「今日分開，係明日重聚開始」。

被KK形容為「青出於藍」嘅阿Zoe就話，佢一三年中開始喺麗閣選區服務，半年多後就開拓隔籬幸福選區，離開後先發覺KK嘅辦事處有四百三十呎大，除咗要幫街坊處理房屋、福利等問題外，仲要幫手處理好多「奇難雜症」，將來街坊過一條馬路就可以搵到民協幫忙喎。