平等機會委員會上周二公布有關「立法禁止性傾向、性別認同及雙性人身份歧視的研究」報告，報告指有逾五成受訪者贊成立法，相比十年前嘅結果增加一倍。人稱「廢鑊」嘅平機會主席周一嶽向來高調支持同志運動，應該幾滿意份研究報告，但性傾向條例家校關注組就批評報告冇水準，而且觀點有扭曲成分。召集人黃偉明尋日召開記者會，批評廢鑊擺明偏幫性小眾人士，認為平機會份報告係擘大眼講大話，「擺明呃人」！

黃偉明（左）批評周一嶽擺明偏幫性小眾人士。

黃偉明話三場討論會當中，得第三場先有反對立法人士獲邀出席，而且十幾個獲邀嘉賓當中，得三人係反對立法。佢就話當時有勸喻過主辦機構，希望佢哋邀請多幾位反對立法嘅人士出席，但最後主辦機構都係冇聽入耳，批評廢鑊我行我素，擺明有預設立場。

束健銘寸報告「高大空」

廢鑊當日喺發布會中指出，有廣泛案例去證明歧視嘅嚴重性，但黃偉明就反駁指報告內嘅歧視個案根本冇真確性，因為平機會係以網上匿名方式收集個案，根本冇途徑去驗證個案。佢亦指份報告同十年前嘅報告調查範圍同問法都唔同，根本就唔可以作比較，認為廢鑊擺明呃人。佢仲話未來會就報告同政制及內地事務局溝通，亦希望可同廢鑊理性溝通，並向大眾交代。

前總平等機會主任束健銘就以「前無古人，後無來者」嚟形容份研究報告，諷刺份報告千瘡百孔。佢仲話份報告「又幾精深，又幾博大」，覺得好值得頒個諾貝爾獎，擺明寸爆廢鑊「高大空」啦！

第一手消息請下載on.cc東網iPhone/iPad/Android/Windows Phone Apps