政壇：搞搞政：鄉紳展拳腳 三「強」傾組黨
新界鄉議局早前開會已有人公開吹雞籌組「新界進步聯盟黨」（新進盟），但因鄉議局係法定諮詢機構，結果提臨時動議嘅上水鄉事委員會主席侯志強亦無奈收口。不過，轉個頭，鄉議局主席劉業強前晚宴請副主席林偉強、侯強及其他鄉頭食團年飯時，又傾埋組黨事宜。三「強」密會，即使傾唔出結果，都可以收到鄉事派跳草裙舞嘅效果，等合作嘅政黨多啲重視吓鄉民利益。
據悉，飯局獲多個鄉頭現身撐場，坐滿四圍枱，大家原則上支持組黨。有鄉紳揚言，要靠組黨新界人先有出路，並屬意劉業強「揸莊」，喺鄉議局體制外另設小組籌備組黨，料農曆新年後成事。不過，呢晚就唔見做咗切膽手術嘅另一名副主席張學明，唔知係割咗膽就冇膽現身，定係因病休養？
沈豪傑指太忙拒撐
鄉事派喺四年前立法會選舉時，曾派出邱榮光同陳強分別出選新界東及新界西，惟雙雙敗北。佢哋認為未來應該改變鄉事派只維護原居民利益嘅固有形象，提升至維護泛新界人利益。不過，亦有缺席前晚飯局嘅鄉紳表明唔撐組黨，就連早前盛傳會出戰新界西嘅元朗區議會主席沈豪傑都表明，區議會及律師行事務已夠晒忙，根本無可能兼顧立法會工作，所以無意參選立法會。
