政壇：老將爭位 工記內訌

周聯僑接受查詢時承認報咗名，佢話早前建造業總工會理事會開會，一致通過提名佢參加甄選，其中一個原因係業界近年面對唔少棘手問題，包括多項工程撥款遇到拉布，數以千計工人面臨失業，當然標準工時、取消強積金對沖機制等都相當急切。

吳秋北拒競逐出選

佢又話，近年議會內唔少激進派議員都大大聲，甚至爆粗、掟杯，有工友因此覺得現任勞工界議員太斯文，反問點解佢哋唔可以大大聲同講粗口對撼，言下之意，似乎對郭偉強同鄧家彪有啲意見。

周聯僑直言，呢場係公平競爭，無論後生仔定老人家都可以報名，唔覺得係同後生仔爭食。不過佢承認除咗地區工作經歷之外，學歷、年紀同英文能力都好重要。

佢又提到，曾經鼓勵理事長吳秋北都一齊報名角逐出線，皆因對方近年活躍於勞工界同政界議題，相信做埋立法會議員，會令政途更加完整。但吳秋北就斷言唔會參加今次內部甄選，因為佢現時主要負責工記嘅運作，而唔係立法會議席呢方面。至於將來會否考慮，佢話言之尚早喎！據聞，通過今次內部甄選嘅人選，要先接受培訓，再決定花落誰家。所以報名只係揭開戰幔，好戲陸續有來。