城中鏡：乖女牙牙學語蔡加讚變公公

玩具大王蔡志明兒子蔡加讚最近再做爸爸，日子愈來愈忙，尋日佢要去公司做嘢，竟然帶同一歲五個月大嘅女兒Celine一齊出發，先去公司巡視業務，又同同事一起飲茶，今次可算本月十八日佢添咗對孖仔後首次露面。

蔡加讚獨自湊囡囡返公司，工作之餘，又同同事飲茶。

蔡加讚一對孖仔今個月出生，長得精靈可愛。

Celine嘅樣激似媽咪汪圓圓，又唔怕陌生人，好似開心果咁經常笑，乖巧嘅佢，全程都冇扭計，很鍾意食嘢，已經牙牙學語嘅佢，不停叫加讚「爸爸」同「老公」，點解呢？加讚話：「佢會叫我老公o架（學圓圓叫加讚），不過有時會發唔到老字個音，叫o左公公。」

下胎易再生twins

加讚話，今次係佢第一次自己帶個女出街，圓圓對老公嘅第一次好緊張，不停傳訊息畀我問個女乖唔乖，有無食o野，知道個女咁乖，就讚囡囡表現好。問到已經兩子一女嘅佢，仲有冇打算再添一個？佢話自己冇所謂，但唔想圓圓辛苦，而且，醫生話明佢哋下胎好大機會都係twins（雙胞胎）。