城中鏡：美荷樓話舊
位於石硤尾的美荷樓係首批「活化歷史建築夥伴計劃」嘅歷史建築，由香港青年旅舍協會（YHA）負責進行保育及活化，變身成為青年旅舍，近日獲頒聯合國教科文組織嘅「亞太區文化遺產保護獎」，尋日舉行頒授儀式。除咗聯合國教科文組織東亞區文化事務組主管Himalchuli Gurung主持儀式，發展局局長陳茂波、深水埗區議會主席張永森、YHA主席廖仲賢都有出席，仲講吓同美荷樓嘅那些年添。
廖仲賢（左起）、陳茂波、張永森、Himalchuli Gurung即席揮毫寫揮春賀年。
黃奕鑑話自細在深水埗劏房長大，對該區都有感情。
美荷樓青年旅舍獲頒「亞太區文化遺產保護獎」。（資料圖片）
黃奕鑑難忘劏房歲月
陳茂波話，佢當時居於石硤尾木屋區，家境較窮，連新年利是都要全數上繳給媽媽，有時屋企人忙得滯冇飯食，仲會去隔籬鄰舍黐餐。有年農曆新年拜完年之後返屋企，發現成間屋被火燒到冇晒，結果成家就去姨媽嘅美荷樓屋企暫住，由於細個唔識愁，翌日仲同朋友走番火災現場，睇吓執唔執到碎銀。回憶幼時嘅難忘歲月，真係別有一番滋味在心頭，而YHA前主席黃奕鑑細個就住深水埗劏房長大，對該區都有番咁上下感情。
臨近農曆新年，一眾嘉賓尋日都齊齊應節，即席揮毫寫揮春賀年，陳茂波寫咗「健康快樂」，佢手字獲得司儀稱讚，但佢就講笑話，因為細個罰抄得多，所以練成一手靚字。張永森就寫了「政通人和」，唔通佢因為以一票之差贏咗民協譚國僑當選主席，擔心區議會事務上隨時會諸事不順，所以希望政治路路暢通同人事和諧？
