政壇：警護校委有錯擺「明」係歪理

香港大學校務委員會本周二晚開會，再次受到學生衝擊。校委會主席李國章最後要喺警員護送下，先至可以離開，事後各方意見多多，港大校委之一嘅張達明尋日就話，警員突然喺校園出現，護送李國章同校委離開，令人覺得係轉移視線，亦令校長馬斐森同學生之間嘅對立加劇喎。

張達明呢個觀察，或者反映部分港大人嘅睇法，但聽落就對被圍嘅人唔公平，事實係當晚學生群情洶湧，又衝門、又鎖門，李國章同一眾校委離開時，被人圍到水洩不通，連召救護車都上唔到，咁嘅情況下，試問若非警員護送，其他校委點樣離開？

如果張達明係關心學生同馬斐森嘅關係，應該留意到當晚馬斐森都話自己嘅安全受到威脅。張達明作為港大教職人員，對學生嘅表現及行為都有指導責任，與其諉過他人，更應該教曉學生尊重他人嘅權利、和平表達意見比肢體表達更有力。