政壇：鍾伯請食飯 小股東開心
上市公司股東會形形色色，出咗名對小股東好嘅萬邦投資就好有公司風格，今年照舊喺中環一間大酒樓開股東會，會後亦係擺十幾圍筵席宴請股東，今年應該有九十六歲、堪稱最年長上市公司主席嘅「鍾伯」鍾明輝都有出席，同小股東一齊開會，一齊食飯。
萬邦主席鍾明輝（左）同小股東一齊開會、一齊食飯，盡顯老牌上市公司嘅人情味。
問到公司會唔會賣盤，鍾賢書（圖）講到明「我伯爺喺度唔會賣」。
鍾伯有心有力，同大家開會之餘，仲留低一齊食嘢，已近百歲嘅佢睇上去幾精神，只係話怕凍咗啲啲，好彩酒樓感覺都幾暖。鍾伯位公子、即係執行董事鍾賢書好尊重阿爸o架，有人問到佢公司會唔會賣盤，佢講到明「我伯爺喺度唔會賣」。
佢哋尋日嘅菜式都好應景，有「發財好市」、「聚寶盆菜」，好味又好意頭，其他點心亦中上水準。最緊要係股東個個食飽飽，唔會出現有人爭嘢食嘅尷尬場面，氣氛都幾和諧。
