政壇：「白哥哥」上身 謝偉俊搶眼
立法會議員謝偉俊（Paul）一向對衣着好有心得，喺政壇中，更屬好有特色嘅一群，尋日佢就以一襲白色長身羽絨內配搭白色樽領上衣、白褲、白鞋現身立法會，一身白色好搶眼，唔通佢要做「白哥哥」？
謝偉俊尋日全身白亮相議會。
阿Paul過去着過長衫國服、短褲仔出席會議，尋日呢套又成為焦點，佢笑言，「全白裝」唔係專人配襯，只係按自己嘅心情，因為平日佢都係視乎心情，配襯唔同顏色嘅衫，咁尋日嘅心情係乜呢？答案係「白雪雪」。佢跟住話，長身羽絨並唔係好暖，「呢啲玩嘅啫」。不過，Paul呢襲「全白裝」喺喪禮、戴孝時就常見，年近歲晚着成咁真係要有膽識。
