政壇：立會議事 老貓頻燒鬚
立法會本來係莊嚴嘅立法議事重地，但近年因為議會兩大陣營嘅爭鬥，搞到開會變嗌交，議員經常罔顧《議事規則》，甚至違反開會嘅章程，尋日做官幾年嘅商務及經濟發展局局長Greg蘇錦樑喺議會出錯，做咗議員十幾二十年嘅「大舊」陳偉業亦衰咗，搞到一個畀主席截停發言，一個畀主席教英文。睇嚟，官員、議員都要惡補吓議會規例至得喇。
Greg蘇尋日出席立法會續會時，畀議員郭榮鏗批評佢連基本合約原則都唔清楚，未夠班討論再深一層嘅嘢，Greg蘇梗係忍唔住，立即出言反駁，結果，主席曾鈺成即刻截斷佢講嘢，提醒佢所提嘅並非規程問題，有意見應該留待官員嘅發言時間發表喎，部分泛民議員借機起哄。其實，唔少立法會議員都經常喺議會內胡亂提出規程問題，唔係藉此拖延會議，就係藉此攻擊政敵，泛民議員更經常將議事規則當成議會博弈嘅武器喇，家吓一見Greg蘇衰咗就起哄，擺明玩報復，自暴其醜。
混淆「暫停」「休會」 主席教精
講到唔熟議會規則，大舊都係一個。尋日會議上，大舊批評建制派反對休會，但前日主席宣布休會時，就第一時間撲出門口，指摘佢哋自相矛盾。曾鈺成聞言就糾正佢，話當時係宣布「會議暫停」而非「休會」，大舊繼續死撐，話兩者喺英文上有共通點，呢個時候，英文了得嘅曾鈺成再次出手，教精大舊兩者嘅差別，曾話：「會議暫停」嘅英文係「suspended」，而休會係「adjourn」，兩者本質上係唔同嘅。咁到呢度，大舊都知無得再死雞撐飯蓋，只好以「多謝主席指點」作完場。
