養和醫院院長李維達太太Ava鄺靄慧係港大外科學系臨床副教授，更係香港遺傳性乳癌家族資料庫創辦人。經常忙住照顧病人、做研究、慈善工作等，忙碌時每日只係瞓得四、五小時，絕對係「工作狂」。

鄺靄慧珍惜同老公相處時間。

佢笑言「醫生都係人」，亦會疲勞，但佢慶幸自己熱愛所做嘅工作，從來唔覺得上班辛苦。佢笑言：「其實有時我都會同老公呻攰，佢畀到好多精神上支持我，同我講我做緊嘅嘢好有意義。其實我可以唔做，係我自己唔捨得。」雖然同老公都係「大忙人」，但兩人會好好珍惜相處時間，Ava話：「老爺李樹培有句『金石良言』畀我哋，無論幾忙都好，都要有quality time（寶貴時光）。」

Ava將畢生嘅努力花喺醫學上，現年四十三歲嘅佢坦言從前因不斷咁讀書、考試同排山倒海嘅工作，而錯過咗生育嘅黃金時間。問佢曾否感後悔？佢諗一諗就話：「冇。每個人嘅人生計劃都唔同，我都做到好多嘢，好開心。不過我畀大家嘅建議係早啲生，一來冇咁多困難，二來有多啲精力湊。」但佢坦言至今仍「未放棄」生兒育女，佢會先嘗試以自然方式懷孕，若到一定年紀仍未成功，就會嘗試以人工方式懷孕。

第一手消息請下載on.cc東網iPhone/iPad/Android/Windows Phone Apps