城中鏡：美食抗拉布
泛民主派喺立法會就《2014年版權（修訂）條例草案》拉布拉唔停，為對抗泛民瘋狂點算會議法定人數，建制派就發明咗「整點休息」，只係每小時離開會議廳，休息十三分鐘，以防流會重演。商務及經濟發展局局長Greg蘇錦樑等官員尋日就先後親自帶同點心、燒味等美食探班，為建制派打氣，但一班泛民議員亦冇執輸食埋一份，食完仲要彈三彈四，令一向痛恨拉布嘅工聯會「阿王」王國興大鬧泛民議員。
蘇錦樑（左圖）買咗熱辣辣點心（右圖）為建制派議員打氣。（互聯網圖片）
蔣麗芸食飽飽，即提出規程問題，向泛民議員挑機。
梁美芬質疑陳家洛指建制派「有軀殼、無靈魂」有冒犯。
阿Ann挑機反被秒殺
話說尋日朝早阿Greg買咗叉燒包、蝦餃等熱辣辣點心為建制派「送暖」，到下午唔知係咪驚建制派食晏太匆忙食唔飽，又有官員帶同燒肉、叉燒同北海道牛乳蛋撻去會議廳前廳。拉布嘅人民力量議員「大舊」陳偉業一於冇執輸食埋一份，但食完仲要嫌三嫌四，大彈燒肉塊皮腍晒，唔夠脆喎。大舊仲講明，佢「食還食，布一定會照拉。」激到阿王大鬧泛民「又食又拉，厚顏無恥」！
可能因為食飽飽，開會動力都大啲，班建制派議員喺會上多次提出規程問題向泛民挑機，其中Ann蔣麗芸就話，根據議事規則，議員喺全體委員會階段，只可討論法案細節，不得討論其原則，但主席曾鈺成就話發言嘅議員並冇違反議事規則，即時秒殺阿Ann。
其後公文袋陳家洛發言，引用法國哲學家笛卡兒名句「我思故我在」，質疑建制派喺會議廳內又唔係諗嘢，又唔係發言，「有軀殼、無靈魂」，建制派梁美芬就喺座位「彈起」，高呼「佢話建制派唔用腦！」要求陳家洛收回言論。搞到暫代主席職務嘅梁君彥要特登休會，翻聽錄音做裁決，結果裁定陳家洛無違規。最後開咗十一個鐘會都係得個吉。
