政壇：阿達要響朵 靠遊行佔「中」
話說街工立法會議員「阿忠」梁耀忠早前放風，話有意轉戰超級區議會議席，而本身嘅新界西直選議席就改由做咗兩屆葵青區議員嘅「阿達」黃潤達接班。不過，一直留喺地區工作嘅阿達似乎知名度欠奉，要成功當選唔係咁容易，佢尋日就透露已擬定多個公關策略，其中一個就係喺遊行時由「靠邊站」變成「企中間」，咁就可以提升知名度？
黃潤達打算遊行時由「靠邊站」變成「企中間」，可以提升知名度。
據知，阿忠曾經同多個泛民政黨摸底，而盛傳會借區議員提名畀街工嘅民協，聽聞依家又唔係好願意，因為該黨都要扶植黨內年輕人上位。阿達話會唔會出戰直選，主要係睇阿忠同泛民嘅協調，如果阿忠出戰超級議席，佢就順勢接替阿忠嘅新界西議席，否則阿忠會繼續選新界西，佢排阿忠名單第二。
至於有乜嘢選舉策略，阿達話要學習由配角變主角，遊行時由靠邊站變成企中間，又會整多幾支旗等多啲人認識街工，同時又會用社交平台同年輕人溝通。講到有乜嘢賣點，阿達話好多人話佢係「梁耀忠翻版」，事關大家都有白髮又跑馬拉松，但兩人年紀差一半，所以似阿忠都唔知開心定唔開心好喇！
