政壇：新民黨「選」將 容海恩助陣
被喻為藝人桂綸鎂與吳綺莉混合體嘅靚女大狀Eunice容海恩，一直盛傳係立法會議員、新民黨主席葉劉淑儀喺九月立法會新界東直選嘅「秘密武器」。葉劉同Eunice尋日雙雙在社交網站facebook（fb）宣布，Eunice正式加入新民黨。未知係咪預示Eunice鐵定代表新民黨出戰新界東？
葉劉淑儀（左）成功邀得容海恩加入新民黨。（互聯網圖片）
葉劉喺fb話Eunice係公民力量嘅義務法律顧問，好高興佢接受邀請入黨，大讚對方爽直兼多才多藝，雖然工作忙碌，但都長時間做義工，熱心服務社會，期望佢入黨後，雙方會有更緊密合作。
Eunice就話自己係新民黨新人，要向葉劉同副主席田北辰慢慢學習議政技巧、政治議題，尤其係有關青年創業等範疇，目前亦會專注海上絲綢之路協會青年機遇委員會嘅工作。至於會唔會參加九月立法會新界東直選，Eunice就話暫時未有想法，要視乎將來發展再決定，任何平台都以服務市民為大原則，一切順其自然喎。
