政壇：搞搞政：偲嫣謀選新東 狙擊慢必
唔少「有志者」已密鑼緊鼓，部署出戰九月立法會換屆選舉，包括銜頭多籮籮嘅撐警大聯盟召集人李偲嫣！偲嫣舊年成立「正義聯盟黨」，標榜要走第三路線，組黨後沉寂一時，但聽聞佢最近靜靜起革命喎。
建制泛民夾擊唔易打
偲嫣過去力撐德育及國民教育，又狙擊爆粗責罵警員嘅小學教師林慧思，並就港大副校長風波發聲，連串舉動無疑會被定位為建制派，更傳佢背後有有財力嘅「大水喉」射住。但佢聲言從來無同建制派甚至中聯辦溝通過，過去撐警、撐國教以至組黨都係自掏腰包，至今已使咗二百多萬元，要自行「撲水」周轉，就算今次計劃參選，都要以自己方式集資。
佢透露，參選意向一直遭建制黨派高層阻撓，表明大家唔係同路人，倘若佢堅持參選，一定「無面畀」照樣派人狙擊佢，但佢仍堅持出戰一試。同時出任「反逆向歧視大聯盟」發言人嘅佢不諱言，參選係要狙擊喺立會新界東當選後「出櫃」、全港首名公開同志身份嘅人民力量議員「慢必」陳志全，偲嫣自言兼任油尖旺區家長教師會同香港家長聯會會長至今，撐國教、反對同性戀嘅成績有目共睹，相信過去政績有助爭取選民支持，亦有信心得到年輕人支持。
想以「第三條路」殺出血路並唔容易，一來要面對建制派同泛民嘅夾擊，二來喺佢未出選前可能先要面對有關方面軟硬兼施勸退，要求佢讓路畀建制派大黨或心儀嘅候選人，以免分薄票源，影響勝算。前車可鑑，強行出選必定被封殺，或者得不償失，唔知佢最終會點抉擇呢？
