政壇：中出羊子 聘泳衣女疏爽
新一屆區議會嘅會期開始咗一段時間，參選人嘅選舉開支亦陸續出爐。經常作古裝女性打扮、外號「昭明公主」嘅港獨人士「中出羊子」（原名：鍾銘麟），有份參選舊年底區議會選舉油尖旺櫻桃選區，雖然最終僅獲百多票慘敗收場，但選舉開支卻高達四萬一千三百多元。中出羊子喺選舉期間，曾與一名穿着三點式泳衣嘅性感妙齡少女喺旺角行人專用區巡遊宣傳，原來呢位少女薪酬要二千元，時間係當日下午五時至九時，即係時薪高達五百元。
中出羊子喺今次區選嘅總開支為四萬一千三百四十四點七五元，其中選舉廣告開支同雜項開支已經花咗接近三萬元。喺舊年十一月初，佢就曾經同泳衣女喺旺角行人專用區巡遊宣傳，又聲言若果當選，會爭取每個周末安排美女喺旺角表演。
「八路軍」「道士」上身
睇番佢提交嘅選舉開支，原來佢用咗二千元聘請泳衣女宣傳，時間係當日下午五點至九點，即係時薪五百元。而佢哋所持嘅鳳凰龍獅旗就喺網上訂購，兩支旗盛惠八十元。
除咗聘請泳衣女之外，中出羊子嘅選舉開支整體都非常騎呢，尤其係花錢購買多款戲服做宣傳，每套價值一百元至百多元不等，包括街站用嘅八路軍戲服、古裝囚衣戲服；扮演醫護人員用嘅手術袍、浴帽、圍裙同鋁鉗；驅鬼街站用嘅神父修女袍、道士袍，以及二千張靈符等。此外，佢又去過自拍館影持槍宣傳照，其中一次攝影連化妝已經要八百元。
睇番成份選舉開支，中出羊子都用咗唔少錢，但佢並無獲得任何贊助，換言之每張票二百四十元，唔知佢會唔會覺得偷雞唔成蝕楂米呢？
