政壇：陳維安揭卿姐 枱底「機」密
近日香港氣溫驟降，加上無休止嘅拉布戰，多名議員先後病倒，缺席會議，間接導致前日立法會再度流會。職責包括照顧議員起居飲食嘅立法會秘書長陳維安，大爆白鴿黨主席「卿姐」劉慧卿原來好怕凍，但好彩佢一個「枱底的秘密」，令卿姐好少冷親。
陳維安（圖）大爆卿姐枱底放咗個暖爐保暖。
陳維安尋日出席一個盆菜宴活動時透露，眾多立法會議員當中，以卿姐出名最怕凍，所以要喺佢會議廳枱底嘅位置放個暖爐。正所謂「人暖腿，狗暖嘴」，卿姐對腳成日有陣陣熱風暖住，自然冇咁易冷親喇！
至於陳維安本人尋日就戴咗對皮製手套禦寒，但由於佢近年食開齋，因此唔會食羊肉或者蛇羹保暖。不過，佢話自己都有食盆菜，因為盆菜底部一般會剩低大量蔬菜，非常惹味。
