政壇：工黨敗將再「來」 荃灣劏房謀翻身
工黨去年派出十二人參選區議會，最終只有三人當選，喺主流泛民黨派之中算最差，其中該黨希望重點「搶灘」嘅荃灣區，兩名候選人愉景選區嘅「阿來」趙恩來同汀深選區嘅夏希諾更雙雙落選。不過工黨對作為新西重鎮嘅荃灣區仍未死心，最近喺該區租咗個「劏房」辦事處，希望四年後可以大翻身。
趙恩來（左）同夏希諾雖然喺區選敗陣，但會繼續喺荃灣區服務。
呢個劏房辦事處只得一百呎，連尋日開張切燒豬都要搵隻迷你乳豬。近年香港啲劏房呎價仲貴過山頂豪宅，但阿來透露，呢間位於商場二樓嘅辦事處，月租只須七千五百元，對比起樓下地舖嘅同面積辦事處要成三萬六千蚊月租，算係相當超值，多得有相熟業主以「友情價」租出喎。
