政壇：肥亨破天荒 港鐵站BBQ
新任港鐵主席「肥亨」馬時亨與多名港鐵高層，尋晚破天荒喺尚未通車嘅港鐵海洋公園站宴請傳媒BBQ。肥亨形容今次港鐵車站內宴客肯定係「史無前例」。
馬時亨（左）喺未通車嘅海洋公園站內宴客，右為港鐵行政總裁梁國權。
肥亨當年做政策局長時，不時舉辦燒烤晚會宴請傳媒，當中最出名係燒羊架，今次當然亦唔少得。酒水方面，佢就帶咗一支喺二○一四年白鴿黨黨慶晚宴上投得嘅紅酒，強調如果大家覺得支酒有問題，甚至發現係假酒時，請自行向白鴿黨算帳。點解咁講？原來肥亨一三年出席白鴿黨黨慶晚宴，以三十萬元投得一幅由該黨前主席「AV仁」捐出、聲稱係國畫大師黃永玉手筆嘅名畫，其後被指係假貨。白鴿最終要向黃永玉道歉及向馬時亨退款。
