政壇：新年送八「輸」 星星唔老利
農曆新年將至，有團體尋日搞咗個歲晚以物易物嘅環保活動，邀請咗環境局局長「星星」黃錦星擔任主禮嘉賓。星星出名環保兼慳家，佢攞乜嘢嚟交換？原來係八本有關環保建築同關注剩食嘅書籍，新年流流送書（輸）畀人，而且一送就八本，諧音「百輸」，真係大吉利是！高官離地，好唔貼近民情。
黃錦星臨近新年送「輸」畀人，認真大吉利是。
出席同一活動嘅仲有公專聯立法會議員梁繼昌（Kenneth）同富貴黨立法會議員鍾國斌（Felix），佢哋兩手空空，冇預備任何舊物件嚟交換，唔通係專登嚟「運吉」？Kenneth解釋，佢屋企有好多未用過嘅電燈膽想攞出來捐，但後尾發現原來係鎢絲燈膽，唔係好切合活動嘅綠色生活主題，所以都係唔捐喇。Felix就仲夾硬嚟，話自己從事製衣業，可以捐出身上着緊嘅名牌服飾補數，但可能由於尋日天氣太凍，最後佢都係走咗數。
尋日仲有一段小插曲，話說Kenneth喺參觀園藝治療花園時，一聞就認到「迷迭香」，話最啱煎羊扒。佢嗅覺咁靈敏，點解早前又會將立法會枱底嘅污漬聞錯咗做糞便呢？
