政壇：楊偉雄喜得知音人
創新及科技局局長楊偉雄唔經唔覺已經上任兩個月，不過，楊局長嘅表現就似乎仲處於新人期，出席立法會仲係唔熟書，被譏「九唔搭八」，上星期喺一個閉門創科論壇上，佢又好威威咁話自己「真係見過」蘋果公司已故始創人Steve Jobs（喬布斯），結果畀網民恥笑。堂堂創科局高官，竟然一副小粉絲咁嘅心態，真係唔怪得外間對佢嘅信心愈來愈小。不過，毀潮中都有個知音人，行政會議成員「羅范」羅范椒芬尋日就力撐楊偉雄有科研基礎，係局長嘅不二人選，仲撐佢做多幾年添，楊局長真係要聞訊流涕囉！
羅范接受電視台訪問，就被問到上任兩個月嘅楊偉雄係咪適合做局長，羅范就反問，楊偉雄唔夠班係從何說起？佢仲話︰「我以前都講不作第二人選添。」羅范認為，楊偉雄做過工業同教育，又有香港同內地網絡，好適合做創科局局長。
羅范：基礎好網絡強
咁楊偉雄有乜咁令羅范欣賞呢？羅范就話，楊偉雄本身嘅科研基礎好好，又做過工業，大學又做過，亦都做過投資者，喺香港同內地嘅網絡非常強，仲反駁如果唔搵楊偉雄，「再搵一個人畀我」。
但係創科局拖拖拉拉等咗三年先至成立到，楊偉雄嘅任期又只剩下一年半，就算佢好似羅范咁講到萬中無一，又有幾多時間畀佢去發揮呢？羅范就不以為然咁話︰「點解認為佢只做年半？」羅范又話唔應該將行政長官嘅任期同埋政策任期掛鈎，唔理特首梁振英下一屆仲做唔做，只要政策係對社會好，得到社會支持，都可以繼續，局長想嘅都可以繼續做咁話喎。唔知道得到羅范力撐，楊偉雄會唔會信心大增，心郁郁想做多幾年局長呢？
