樓市冇乜成交，地產代理零舍難捱。利嘉閣總裁Willy廖偉強就話要喺呢個艱難時期磨練吓自己，今個月開始每朝六點鐘起身寫文鍛煉意志。文章主要都係講做人嘅道理，以二字為標題，好似係《勤奮》、《禮貌》、《堅持》、《胸襟》咁。

廖偉強(圖右)話學懂做事首先要學懂做人。

Willy仲分享咗《胸襟》裏面嘅一段小故事：有一日老和尚將一羹鹽放落杯水叫小和尚飲一啖，小和尚覺得好鹹，之後又分別喺一缸水同一個湖度落同樣一羹鹽叫小和尚飲，答案當然係冇咁鹹啦！以水喻人嘅胸襟，果然境界高。佢話要學懂做事首先要學懂做人，所以每朝寫好文章都會傳畀公司嘅經理睇，仲話去到月尾就會一次過傳畀所有同事，話要以身作則做示範。咁會唔會再出書？Willy就話自己唔係文人，現階段都係打理好生意先。

第一手消息請下載on.cc東網iPhone/iPad/Android/Windows Phone Apps