城中鏡：歸元田居
十八鄉鄉事委員會主席梁福元平日予人外表粗豪嘅感覺，但原來都有柔情一面，佢最近歸園田居，同佢細仔、同屬元朗區議員嘅Jason梁明堅父子檔「調理農務」，聽日起喺大棠舉辦漢牡丹展之餘，兩父子仲親自負責展覽嘅園林設計，梁福元更表明希望Jason可全力接棒，等佢可早啲退休，同湊成兩個「好」字嘅四個孫三代同堂。
展期開始前所有牡丹都要先放入冰雪館暫存，避免提早開花。
梁福元親自負責展覽園林設計。
梁明堅與太太兩年抱兩。（受訪者提供）
梁福元前年將哈爾濱冰雪節引入港，喺大棠有機生態園建造大型戶外冰雪館搞冰雕展覽，可惜當年冰雪節撞正佔領行動，大批內地客取消來港，最後要蝕少少收場。佢今年決定食住大棠賞紅葉條水，斥資逾三百萬元，專誠從河北引入十六款、過萬棵漢牡丹來港展覽，展期喺聽日開始，為期兩個月，號稱全港最大型漢牡丹展。
據知漢牡丹品種罕有，香港氣候原本唔適合種，梁福元專誠搵內地專家來港培植，展期開始前所有牡丹都要先放入低溫庫，避免提早開花，每隔兩周就要換過批準備開花嘅漢牡丹，相當揼本。
乖孫湊夠兩個「好」
今次拍住Jason負責花展設計，自言中學未畢業嘅梁福元透露，原來早喺九十年代已修讀華南農業大學果樹系文憑，至於Jason早年喺倫敦大學學院（UCL）修讀電子及電機工程，回港後，前後花咗四年時間，讀咗中大專業進修學院園林設計及管理，同樹藝師兩個高等專業文憑，喺大棠嘅務農工作唔使假手於人。
另一方面，Jason喺一二年迎娶被指貌似華姐冠軍苟芸慧嘅Alice後，兩公婆兩年抱兩，生咗兩個囡囡，雖然佢哋冇丁權，但梁福元大仔梁智峯亦生咗兩個囝囝，啱啱好湊成兩個「好」字。梁福元仲話一早睇透「老人政治」行唔通，睇好Jason同由佢一手提攜嘅新任元朗區議會主席沈豪傑接棒，難怪佢日前表明立法會選舉只會幫鄉事派「抬轎」，無意親自出征喇！
