政壇：邱金榮自家米線玩口感

原來唔同年份或者出產地，整出嚟嘅米線硬度都可以有好大分別。本身經營食肆主打米線嘅稻苗學會主席Kelvin邱金榮早排去咗雲南參觀米線廠，特別搵師傅傳授相關技術，準備嚟緊生產屬於自家獨特口感嘅米線。

邱金榮赴雲南學整自家米線。

Kelvin話過往佢哋食肆都只係購買其他廠生產嘅米線，但缺點就係未必會搵到一種最啱心水嘅口感，選擇被限制，而眼見近年市面上好多拉麵店都推出唔同硬度嘅拉麵選擇，佢有感米線都可以做到，靈機一觸決定自己生產，就可以研發唔同硬度及口感嘅米線。

據知Kelvin喺早前雲南之行坐言起行，已經訂製埋生產米線嘅機器，而未來佢會嘗試以唔同種類同比例嘅米製造米線，提供予旗下店舖使用及售賣。