政壇：鄉事派建仔 恩怨浮現
話說上水鄉事委員會主席「侯強」侯志強日前提議成立「新界進步聯盟黨」參選立法會，標誌鄉事派最快今年唔會再幫建仔喺新界東同新界西「抬轎」，佢尋日自爆鄉事派「好大想頭」嘅目標，就係希望喺新東、新西各取兩席，連埋鄉議局功能界別議席，換言之合共取得五席，直言一旦成功組黨對建仔影響最大。
其實遠嘅唔講，喺下月底舉行嘅新東補選，鄉事派一直未有明言會撐建仔嘅周浩鼎，似乎雙方愈行愈遠已浮上水面。
鄉事派同建仔嘅關係一直被指不咬弦，愈嚟愈多客觀事實印證呢個說法，先有鄉事派快將出爐嘅首份民情報告，鬧爆建制政黨喺關鍵時刻「背信棄義，落井下石」；及至本月初元朗區議會主席之爭，鄉事派力撐嘅律師沈豪傑，一舉擊敗爭取連任嘅建仔梁志祥。
周浩鼎拜會鄉頭「補鑊」
侯強喺電台節目中指出，過去只有鄉議局同政府喺丁屋僭建、丁權爭議等議題周旋，聽唔到有任何政黨幫佢哋發過聲，雖則佢其後死撐話同建制政黨關係其實唔錯，但好戲在後頭，佢疑意有所指話，「畀人踩兩腳咪同佢講對唔住，行得快得滯畀你踩親，咪多謝佢，下次小心啲」，又形容四海之內皆兄弟，「手掌係肉，手背都係肉」，着大家用腦去分析。觀乎侯強怨氣咁重，邊句先係真心嗰句，大家心裏有數。
面對鄉事派接連展示實力，一直未得到鄉事派祝福嘅周浩鼎開始「補鑊」，據聞近日積極拜會新界東鄉頭，包括沙田鄉事委員會主席、粉嶺鄉事委員會主席李國鳳等人，但臨急抱佛腳有幾大效果，或者可同新界鄉議局嘅取態可知一二，據知鄉議局月底會討論組黨詳情，但係咪支持建仔嘅代表參加補選，完全唔喺議程之內，凡此種種，可見鄉事派同建仔嘅恩怨，真係冰封三尺非一日之寒！
除咗周浩鼎，新東補選參選人仲有公文袋楊岳橋、新思維黃成智、本土民主前線梁天琦、報稱獨立嘅方國珊、梁思豪同劉志成。
